Nakarecord ang Iloilo Provincial Disaster Risk Reduction and Management Office (PDRRMO) sang duha ka banwa nga may mga evacuees kasunod sang ginpatigayon nga preemptive evacuation bangud sa bagyo Verbena.
Santo sa pinakaulihi nga datos sang opisina, ini ang banwa sang Lambunao nga may 3 ka pamilya nga apektado kag Janiuay nga may 9 ka pamilya nga ginakabug-usan sang 29 ka indibidwal.
Kalabanan sa evacuees ang nagaistar sa low-lying areas.
Nag-provide naman ang tagsa ka local government unit sang mga banwa sang nagakaigo nga bulig sa mga residente nga apektado.
Samtang, may mga areas man nga indi pa maagyan bangud sa paglapaw sang tubig kag ginalakipan sang Overflow sa Brgy. Maspasan, Calinog padulong sa Libertad, Capiz; Overflow sa Brgy. San Jose, Lemery; Overflow sa Brgy. Yawyawan, Sitio Cabugao, Lemery; Overflow sa Sitio Cabugao Brgy. Pontoc, Lemery; Overflow sa Brgy. Nasapahan, Lemery; Agtabo Creek sa Passi City; Mina West-Suage Overflow; kag Quipot-Barasalon sa Janiuay bangud sa rain-induced landslide.
Samtang, ginalauman ang mahinay nalang nga pagbubo sang ulan sa probinsya sang Iloilo samtang nagapakadto na ang bagyo sa Sulu Sea.
Nagpahibalo naman ang PAG-ASA nga posible nga mag-gamay na lang ang kadamuon sang ulan sa masunod nga mga oras, apang padayon ang pag-monitor sang mga awtoridad sa sitwasyon ilabi na sa water level sang mga suba kag dam.
Sa latest monitoring, ang Jalaur River sa Brgy. Moroboro, Dingle, Iloilo yara sa normal nga lebel.
Samtang ang Aganan Dam, Barotac Viejo Dam, Sibalom Dam kag Sta. Barbara Dam yara sa warning status bangud sang gamay nga pagtaas sang tubig.
Nagpaandam naman ang mga awtoridad nga biskan indi mabaskog ang hangin, ang ulan posible mag-abot sa 100–200 millimeters, nga mahimo gihapon magresulta sa pagbaha ilabi na sa mga low-lying areas.
Text: Joedel Nollaga
