TAGAYTAY – Ginakulang sang mga nagapanguna nga kinahanglanon ang mga evacuees sa Batangas.
Sa interview sang Bombo Radyo kay Richard Bacolod sang South Tagaytay City, iya ginpahayag nga santu sa iya obserbasyon sang sila ang nagpadulong sa evacuation center, labi nga kinahanglan ang mga diaper, habol, banig, tubig, bulong, kag madamo pa.
Suno pa kay Bacolod, sang Enero 12, Domingo, naglab-ot lang sa 400 ka mga tawo ang ginbakwit sa isa ka evacuation center sa Batangas, apang subong, nagdangat na ang mga tawo sa kapin 3,000.
Makaluluoy ang kabataan suno kay Bacolod bangud ang iban sa ila ang gina-ubo bangud sa nahaklo nga aso.
Kaangot diri, si Bacolod kag ang iban niya nga kaupod ang nagbulig man sa mga evacuees paagi sa pagserbe sang lugaw kag sopas.
Suno pa kay Bacolod, may mga nagdonar man sang face mask sa mga tawo.
Sa subong, nagapabilin nga wala sang trabaho ang mga tawo bangud may mabatyagan pa nga mga pagtay-og kag suno pa kay Bacolod, nawad-an sang duag ang Tagaytay bangud napuno sang abo ang mga bubong sang balay, mga dahon sang tanom kag mga kahoy.
NO TO FAKE NEWS.
Ginhingyo man ni Bacolod sa publiko nga kun mahimo, likawan ang pagpalapta sang sala nga impormasyon sa social media ilabi na sa Facebook.
Suno kay Bacolod, indi matuod ang mensahe nga ‘forced evacuees’ ang mga naga-puyo sa Tagaytay, bangud wala sang ginpapanaug nga amo nga advisory sa ila.
Dugang sang natungdan, ang kaangay nga mga mensahe ang nagahatag sang kakulba sa ila mga pamilya malayo sa ila.
