ILOILO CITY – Temporaryo nga nagdungka sa Iloilo River ang mga fishing vessel nagikan sa probinsya sang Antique bangud sa Bagyo Betty.
Sa interview sang Bombo Radyo kay Glen Maurillo, Sonar operator sa isa ka fishing vessel, iya ginpahayag nga lima ka adlaw na sila nga nagtinir sa Iloilo River bangud nga mabaskog ang balud.
Ginpili nila nga magtinir sa Iloilo bangud nga wala sila sang panagu-an sa Antique nga makahatag sang proteksyon batuk sa mabaskog nga hangin.
Bangud sini, apektado man ang ila nga operasyon, gani, posible nga ma-apektuhan man ang suplay sang isda sa probinsya sang Antique.
Suno kay Maurillo, ginabanta 15 ka mga crew ang kaupod niya ang maatrasan nga maswelduhan.
Indi man nila mapilit ang tag-iya sang fishing vessel bangud nga wala man sila sang kita.
Ini ang ikaduha na ka beses nga pagtinir nanday Maurillo sa Iloilo River bangud sang bagyo.
