ILOILO CITY- Preparado na ang mga barangay sang syudad sang Iloilo kasunod sang pagpaidalom sa syudad sa blue alert status bangud sa ginalauman paglandfall ni bagyo Tisoy sa Philippine Area of Responsibility.
Sa interview sang Bombo Radyo kay Barangay Kagawad Rona Flores, Chairman sang Committee on Disaster sang Calubihan, Jaro, Iloilo City, iya ginpahayag nga bilang isa ka flood-prone barangay, nahibaluan na sang pumuluyo ang dapat himuon sa tion nga magbubo ang mabaskog nga ulan.
Suno kay Flores, nagamato-mato nalang ang mga pumuluyo nga mag-evacuate kun magtaas ang tubig sa creek sa lugar.
Ginpahayag man sang kagawad nga nagalibot man sila agud paandaman ang mga pumuluyo magluwas pa sa ginapa-tunog nga sirena ukon early warning system agud i-alerto ang mga pumuluyo.
Nahibaluan nga sa masami, yara sa kapin 50 ka mga pamilya ang apektado sang baha sa tion nga magtupa ang mabaskog nga ulan sa Calubihan, Jaro,Iloilo.
