ILOILO CITY – Tubtob subong nga semana na lang ang deadline nga ginhatag sa mga tag-iya sang mga restaurants, bars, kag food establishments nga makabutang sang barriers sa mga lamesa sa ila tagsa ka establisemento.
Ini ang may kaangtanan sa gin-isyu nga Executive Order 169 nga ginpagwa sang nagligad nga Oktubre ukon ang “An Executive Order Mandating the Installation of Barriers in Bars and Restaurants”.
Sa interview sang Bombo Radyo kay Iloilo City Mayor Jerry Treñas, iya ginpahayag nga epektibo sa Lunes, Nobyembre 16, magalibot na ang compliance team, Business Permit and Licensing Office (BPLO), kag ang Philippine National Police (PNP) agud i-check ang mga establisemento kag ipatuman ang closure sa mga non-compliant ukon wala nagatuman sa iya executive order.
Santo sa inisyal nga assessment nga ginreport sa alkalde, 40 tubtob 50% pa lang ang sa mga restaurants, bars, kag food establishments ang nagpahamtang sang barriers sa ila tagsa ka establisemento.
Ang mandu sa pagbutang sang mga barrier ang may kaangtanan sa pagtapna sang COVID-19 transmission sa mga naga-dine in sa mga kalan-an.
