ILOILO CITY – Nagtingob ang pito ka mga fraternity agud nga makatipon sang supply sang dugo kadungan sang pagduging sang Dengue Hemmorhagic Fever.
Ang blood letting activity ang ginpatigayon 9:00 kaina sang aga sa isa ka mall sa Lapaz, Iloilo City sa diin lakip sa mga nagpakigbahin nga fraternity amo ang Alpha Kappa Rho, Gamma Phi Omicron, Tau Gamma Phi Sigma, Sigma Rho Fraternity kag iban.
Sa interview sang Bombo Radyo kay Ian Rico sang Tau Gamma Phi Sigma, iya ginpahayag nga ang ginpatigayon nga blood letting activity ang may katuyu-an nga makatipon sang dugo para sa mga biktima sang Dengue.
Suno kay Rico, paagi sa nasambit nga aktibidad, luyag nila kuhaon ang stigma nga ang mga fraternity ang naangot sa kinagamo.
Ginpahayag ni Rico nga ang katuyu-an sang pagtukod sang fraternity amo ang camaraderie ukon ang pagpakig-abyan kag ang pagbulig sa mga nagakinahanglan.
