ILOILO CITY – Responsibilidad sang isa ka ginikanan nga ihatag ang kinahanglanon sang ila nga mga kabataan.
Ini ang santo sa Executive Order No. 209 ni anay Presidente Corazon Aquino nga may titulo nga “The Family Code of the Philippines”.
Sang damlag lang, nagpaandam si Department of Social Welfare and Development (DSWD) Secretary Erwin Tulfo nga kasuhan sang departamento ang mga amay nga ginapabay-an ang ila mga anak sa pag-atipan sang ila anay partner.
Sa interview sang Bombo Radyo kay Atty. Rudiver Jungco Jr., Bombo abogado, iya ginpahayag nga may yara sang ginabasehan ang tiglikom sang DSWD sa iya nangin paandam.
Suno kay Atty. Jungco, ang amay ukon iloy ang dapat nga maghatag sang suporta sa ila anak apisar pa nga indi sila kasado ukon makabig nga illegitimate pa ang anak.
Sa tion nga magpamalibad ang ginikanan, mahimo nga mag-demand ang nabilin nga partner kag dapat nga tinguhaan gid sang magtimbang nga bahin nga ma-settle ang amo nga butang.
Dugang pa ni Atty. Jungco, may yara sang criminal liability ang isa ka ginikanan sa tion nga indi niya pagtungdan ang iya nga responsibilidad.
Nagpanugyan man ini sa may plano nga magsulod sa isa ka relasyon nga dapat nga mangin mapili kag mahinalungon sa partner.
Apang kun yara na sa amo nga sitwasyon, tinguha-an gid nga i-settle ang amo nga butang kag ang pinakaulihi nga ubrahon amo ang pagdangop na sa korte.
