ILOILO CITY–Nagapang-alang-alang ang kalabanan sa mga ginikanan sa rehiyon nga magpirma sang parents consent agud mabakunahan ang ila kabataan.
Sa interview sang Bombo Radyo kay Dr. Mary Jane Juanico, medical operation officer 3 sang Child health sa Department of Health (DOH) Region 6, ginpahayag sini nga nagapangindi ang mga ginikanan nga magpirma kag kalabanan man sang mga kabataan ang indi luyag magpabakuna bangud sa kahadlok.
Ang mga ginikanan nga wala nakatambong sa mga PTA meeting suno kay Juanico ang wala man nakahibalo kun ano nga sahi sang vaccine ang igahatag sa ila mga kabataan.
Nagpakighinun-anon man ang DOH officials sa mga Principal nga liwat makapatigayun sang pagsinapol agud  mapahibalo man ang iban nga mga ginikanan sa katuyuan sang bakuna.
Ang ginapanghatag nga vaccines ang ginalakipan sang human papiloma ukon anti cervical cancer vaccine para sa mga babayi nga grade 4 pupils kag ang Tenatus, dipteria vaccine para sa mga grade 1 tubtub grade 7.
Indi naman pagbakunahan ang bata kun wala sang consent sang ginikanan.
Ginakahanagaw-an naman suno kay Juanico sa bahin sang mga grade 7 bangud wala nagalab-ot sa ginikanan ang consent kag sila mismo nga estudyante ang nagamato-mato sa pagpirma.
Nahibaluan nga sa Western Visayas, may lima palang ka mga lugar ang ginpatigayunan sang vaccination nga ginalakipan sang Bacolod City, Antique, Iloilo City, Iloilo Province kag Guimaras.