ILOILO CITY – Ginbilin sang mga high value target ang apat ka mga granada nga nasapwan sa Barangay Bakhaw, Mandurriao, Iloilo City.
Sa interview sang Bombo Radyo Iloilo, ginpahayag ni Insp. Juan Tigaronita, deputy chief of police sang Mandurriao Police Station, ginapatihan nga mga katapo sang Prevendido Drug Group ang nagbilin sang nasambit nga mga granada.
Nahibaluan nga ang apat ka granada ang nasapwan ni Generose Alejandro nga nasulod sa sling bag kag ginpakabit sa kawayan, sang ini ang nagpanambo.
Suno kay Insp. Tigaronita, posible nga nagakahangawa ang nagapanag-iya sang granada nga magpatigayon ang mga pulis sang operasyon.
Nahibaluan nga wala sang piyansa kun madakpan nga nagahupot sang mga eksplosibo.
Drug personalities man lang suno kay Insp. Tigaronita ang may ikasarang sa pagbakal sang kaangay nga armas.
Nagapati ang kapulisan nga hungod nga ginbilin sa kawayanan ang mga granada kag posible nga balikan pa ini sang tag-iya.
Ginsaksihan man ni Punong Barangay Remia Gregory nga yara sa listahan sang kapulisan bilang high value target, kag sang iban pa nga opisyal sang barangay, ang pag-confiscate sang kapulisan sang nasambit nga mga granada.