Ginakahangaw-an subong nga panahon sa iban nga mga pungsod ang lapnagon nga cyber attack nga nagakatabo indi lamang sa mga social media platforms kundi pati na sa pribado nga mga kumpaniya.
Sa interview sang Bombo Radyo kay Atty. Doni Valenzuela Almio, iya ginpahayag nga indi lamang ekslusibo nga nagakatabo sa luwas sang pungsod ang ginatawag nga cyber hacking kundi may yara man ini sa Pilipinas.
Suno kay Almio, ang cyber hacking amo ang ginatawag nga pagkawat sang importante nga mga impormasyon ukon data sang isa ka tawo, entity, kumpaniya, kag korporasyon.
Bangud sini, nagaobra ang isa ka hacker ukon kawatan sang katontohan gamit ang importante nga mga impormasyon nga nakuha.
Pahayag ni Almio, may yara sang high level hacking nga ginatawag cyber warfare nga amo ang akto sang nation-state ukon international organization agud atakehon ukon halitan ang computers kag information networks sang iban nga pungsod paagi sa computer viruses ukon denial-of-service attacks.
Ini man suno kay Almio ang natabo na sa Estados Unidos. Samtang ang low-level nga hacking naman suno sa natungdan, amo ang pagpangawat sang impormasyon nga nagakatabo sa mga personal data sang isa ka tawo nga may yara sang social media account.
Suno kay Almio, kun kawaton sang hacker ang identity sang isa ka tawo kag gamiton ini sa krimen, ini ang ginatawag nga identity theft.
Information breach naman ang tawag sa mga nagakawat sang impormasyon sang isa ka tawo agud gamiton sa iya kaugalingon nga benepisyo.
Mahibaluan suno kay Atty. Almio nga nahack ang personal nga account sang isa ka tawo kun may mga pagbag-o nga natabo kaangay sang settings, password ukon mga warning nga ginapa-islan ang password.
Mahimo pasakaan suno sa natungdan sang kaso nga Electronic Commerce Act ukon Republic Act No. 8792 ang mga hacker nga madakpan.
May penalidad man suno kay Atty. Almio nga nagadangat sa masobra P100,000 kag mahimo mapreso sa anom ka bulan tubtob tatlo ka-tuig.
Nagpanugyan man ang natungdan nga mag-aligmat gid kag halungan ang mga personal kag importante nga impormasyon ilabi na sa online bangud tuman ini ka teknikal kag komplikado kun magluntad ang hacking.
