Mga health personnel sang WVMC, mas pabor nga magpatublok sang bakuna sang Pfizer kag AstraZeneca ipaanggid sang China-made vaccine

ILOILO CITY – Manubo sa gihapon ang porsyento sang mga personnel sang Western Visayas Medical Center (WVMC) nga luyag magpabakuna sa Sinovac Vaccine.

Sa interview sang Bombo Radyo kay Mr. Richard Saltin, spokesperson for COVID-19 concerns sang WVMC, iya ginpahayag nga sa pihak sang ila ginpatigayon nga series of orientation kaangot sa pagpabakuna, 25 percent lang sang ila mga personnel ang may salig sa bakuna nga halin sa China.

Suno kay Saltin, mas madamo ang nagasalig sa AstraZeneca kag Pfizer sa diin 47 percent sang ila mga empleyado ang luyag nga magpabakuna sang ila gin-manufacture nga COVID-19 Vaccine.

Nahibaluan nga nag-umpisa naman ang inoculation sa WVMC kaina kag target sang talatapan nga matapos ang vaccination sa sulod sang apat ka adlaw.