Liwat nga ginpukaw ang paglaom sang mga himata sang mga nagkaladula nga mga sabungero matapos ang pagtuhaw sang testigo nga ginkilala kay alyas Totoy.
Sa isa ka diyalogo nga ginpatigayon upod sa Department of Justice (DOJ), ginpahayag sang mga pamilya sang mga missing sabungeros nga nakaangkon sila sang pangibag-o nga paglaom bangud sang mga rebelasyon nga ginsambit ni alyas Totoy.
Suno kay Janice Esplana, isa sa mga himata sang mga biktima, ang mga impormasyon nga ginbuyagyag sang testigo amo na ang ila gina-uyatan agud nga malab-ot ang hustisya para sa ila pinalangga sa kabuhi.
Dugang pa niya, positibo ang resulta sang ila pagpakigsapol upod sa DOJ kag nagapangayo sila sang padayon nga aksyon halin sa mga otoridad agud mapasangkad pa ang imbistigasyon.
Padayon pa subong ang imbistigasyon sang mga otoridad agud mahibaluan ang matuod-tuod nga natabo kag mahatag ang hustisya sa mga pamilya sang mga missing sabungeros.
