Nakadepende na sa mangin plano sang mga concerned agencies kag Iloilo City Government kun paano mahawanan ang Budburan Creek sa distrito sang Lapuz sa syudad sang Iloilo sa tion nga ini ang maumpisahan nga makaayo.
Ini bangud may mga mangroves nga yara sa lugar nga mahimo maapektuhan sa patigayunon nga rehabilitation.
Sa interview sang Bombo Radyo kay Noel Hechanova, pinuno sang City Environment and Natural Resources Office (CENRO), iya ginpahayag nga kun patigayunon ang dredging sa creek, mas maayo nga mauna anay kuha ang mga illegal settlers kag i-preserve ang mangroves.
Suno kay Hechanova, kun makaapekto ang mangroves sa pag-ilig sang tubig sa Budburan Creek, mahimo man ini nga masaylo sa iban nga lugar nga may mga proyekto sang syudad kaangay sang Esplanade apang kinahanglan nga sekyaron gid ang permit antes kuhaon ang mangroves.
Samtang pahayag naman ni Engr. Mavi Gustilo, head sang Office of Building Official (OBO) sa syudad sang Iloilo, ang Budburan Creek ang indi nagakadapat nga patindugan sang istruktura.
Suno sa iya, pat-od nga wala sang building permit ang mga balay kag boarding houses nga nahamtang sa creek bangud maka-issue lamang sang permit ang opisina kun may yara ini sang titulo sang duta ukon may gina-uyatan nga contract of lease.
Mahimo maka-issue ang Department of Environment and Natural Resources (DENR) sang notice nga pahalinon ang mga illegal settlers sa lugar kag posible man sila madagdagan sang illegal construction sang Office of Building Official kag i-demolish sang Task Force Anti-Squatting and Illegal Structures Unit.
