ILOILO CITY- Ginpatigayon na ang ‘Illumination of Sunburst Park’.
Kada gab-i, masaksihan na ang matahom nga mga suga sa Sunburst Park kag ini ang magahatag sang kalingawan sa mga Ilonggo sa tion sang paskwa.
Ini nga proyekto sang Iloilo City Government sa idalom ni Iloilo City Mayor Jerry Treñas kaupod ang Florete Group of Companies ang magahatag sang kapawa sa Sunburst Park nga isa ka landmark sa Iloilo City.
Pinaagi sa pagpasiga sang Sunburst Park sa tion sang kagab-ihon, masaksihan sang tanan ang katahom sang palibot.
Sa interview sang Bombo Radyo kay Mayor Jerry Treñas, nagpabutyag ini sang pagpasalamat sa Florete Group of Companies sa pagpanguna sang chairman nga si Dr. Rogelio Florete bangud sa mabakod nga partnership sa syudad.
Suno sa alkalde, makatipon-tipon ang mga magpamilya, magbarkada kag magkahagugma nga wala sang kakulba bangud sang kasanag nga dala sang mga christmas lights sa Sunburst Park.
Ang mga suga sa tagsa ka kahoy ang indi lang basta-basta bangud himo ini sa Capiz shells sa diin naghalin ini mismo sa Capiz kag ginpadala sa Iloilo City.
