ILOILO – Nagaguwa sa pagtuon nga ang mga Ilonggo ang may yara sang best sex life ipaanggid sa iban nga Visayans.
Santo sa 2019 PhilCare Wellness Index, kalabanan sa mga Ilonggo ang sexually active.
Sa Iloilo City, ang Wellness Index sang sex life ang yara sa “good” samtang “somewhat good” naman sa Bacolod City, Cebu City, Tagbilaran City kag iban pa nga lugar sa pungsod.
Sa interview sang Bombo Radyo sa Lead researcher kag University of the Philippines associate professor nga si Dr. Fernando Paragas, ang PhilCare Wellness Index ang talaksan sang health and wellness sang mga Filipino.
Ini ang ginabug-usan sang anum ka wellness domain nga ginalakipan sang psychological, physical, medical, nutritional, financial kag lifestyle sa diin ang mga Ilonggo ang nagapanguna kun sexual acitivity ang pagahambalan.
Magluwas diri, ang mga Ilonggo ang pinaka-stress kun medical wellness ang pagahambalan nga may yara sang “good,” nga rating.
Ang Iloilo ang ginasundan sang Legazpi, Bacolod, San Fernando City, La Union kag Pili, Camarines Sur nga may yara lamang sang “somewhat stressed.”
Ang mga Ilonggo man ang may pinakadako nga gasto kun wellness kag vices ukon bisyo ang pagahambalan.
Nagaguwa nga kalabanan ang nagapanigarilyo kag nagapahubog.
Ang nasambit nga pagtuon ang ginpatigayon sa 1,350 respondents nga naga-edad sang 18-90 anyos.
Kabahin sa ginpamangkot amo ang tuhoy sa sex life, stress, vices kag health practices.
