ILOILO CITY – Nanasari-sari ang paghangop sang publiko kun ano ang kahulugan sang kahilwayan.
Ini ang may kaangtanan sa pagsaulog sang Pilipinas sang ika-121 nga anibersaryo sang kahilwayan gikan sa kamot sang mga mananakop.
Sa interview sang Bombo Radyo kay Fernando Libertad, 64, isa ka stroke survivor, iya ginpahayag nga indi pa lubos nga hilway ang pungsod bangud sa mahinay nga aktu kag pagbulig sang gobyerno sa mga nagakinahanglan.
Ginpahayag ni Libertad nga bilang isa ka stroke survivor kag naga-isahanon na lang sa pagpangabuhi, mabudlay para sa iya ang makakita sang palangabuhi-an kag nagalaum na lang kun tani sa pension nga igahatag sang gobyerno.
Para naman sa isa ka concerned citizen nga nagpahinago lang sang pangalan, ang kahilwayan ang yara sa kamot sang ulihing tubo.
Ginpahayag sang concerned citizen nga indi makaangkon sang kahilwayan ang Pilipinas kun ang tagsa ka Filipino ang nagahisaay sa baylo nga magbuligay.
Para naman kay Gerlyn Joy Rojo, estudyante sa West Visayas State University (WVSU), iya ginpahayag nga bilang pamatan-on, nagakadapat nga mangin responsable sa paggamit sang internet kag social media.
Nagakadapat man suno kay Rojo nga ang mga ulihing tubo ang magpakigbato kun ano ang kamatuoran kag indi magpabulag-bulag sa nagakatabo sa pungsod.
Para naman sa Education Student kag Filipino Major nga si Eric Morguia Jr. sang WVSU, indi pa lubos nga hilway ang Pilipinas.
Mangin hilway lang suno kay Morguia ang pungsod kun ang tanan ang may yara sang independent thinking.
Para sa Ten Outstanding Students of the Philippines (TOSP) nga si Marvin Malificiar, wala sang kahilwayan ang Pilipinas bangud nga ginapabay-an sang gobyerno nga sakupon ang Pilipinas sang iban nga pungsod.
Mangin hilway lang ang pungsod suno kay Malificiar kun matupungan na sang Pilipinas ang mga mainuswagon nga nasyon sa kalibutan.
Ang Independence Day naman para kay Gabriel Felix Umadhay, Presidente sang Iloilo Pride Team, amo ang pagsaulog sang mga Filipino sa mga kadalag-an kag kaayuhan nga naangkon sang Pilipinas.
Palatandaan man ang kahilwayan nga madamu sang mga Filipino ang nagrisgo sang kabuhi agud nga pangapinan ang Pilipinas.
Sa pihak sini, ginakabig naman ni Umadhay nga indi pa lubos nga hilway ang Pilipinas bangud sa pila ka kakulangan.
