Nagalaum naman ang mga Ilonggo nga nag-upod sa rally subong nga adlaw nga mamurag-muragan ang gobyerno kasunod sang dako nga hublag-protesta nga ginpatigayon sang mga Pilipino.
Sa interview sang Bombo Radyo kay Dr. Herman Lagon, Master of Education, kag kabahin sang Alumni Association sang University of the Philippines-Visayas, iya ginpahayag nga indi na normal ang nagakatabo nga kurapsyon kag ini nga hublag subong nga hapon ang nagapakita kun ano na ka akig ang mga tawo.
Nagalaom naman ini nga indi lang pagpadayaw-dayaw ang rason sang iban kun ngaa nag-upod sila sa rally ilabi na bangud anibersaryo subong sang deklarasyon ang martial law.
Pahayag sini, nakit-an niya sa mga kabataan kag sa organizers nga sinsero sila, kag ini nga protesta ang pamuno pa lamang sang mas madamo pa nga mga hublag.
Para naman kay Earl John Lopez, alumnus sang University of the Philippines-High School, nag-upod siya sa protesta bangud nakit-an sini ang paglala sang kurapsyon paagi sa expose nga natabo sa Kongreso.
Paagi man ini suno sa iya nga magkampanya para sa mga pumuluyo nga magpili sang mayo nga mga lider nga magarepresentar sang husto sa mga Pilipino.
Lakip man sa nag-upod sa rally amo si former Vice Mayor Jeffrey Ganzon.
Pahayag sini, intact ang iya nga integridad bilang anay opisyal sang gobyerno, gani nga wala siya nahuya nga mag-upod sa panawagan batok sa kurapsyon.
