Ginpun-an sang pag-intindi, maayo nga pamatasan kag pagpalangga sang duha ka mga iloy nga taga- San Enrique, Iloilo ang ila puluy-an rason nga nangin maayo ang pagpadako sang mga ini sa ila nga mga kabataan.
Sa interview sang Bombo Radyo kay Josephine Paborada, iloy sang 13 ka kabataan iya ginpahayag nga wala ginkalimtan sang iya mga kabataan ang pamatasan nga ila natun-an sa ila puluy-an bangud nagbunga ini sang maayo nga resulta.
Iya man ginpahayag nga sa tyempo sa karon tuman ka importante ang pagpa-eskwela sa mga kabataan agud maagom sang mga ini ang mayo nga buwas damlag.
Bilang isa ka kagawad sang una suno pa sa iya nga importante nga mangin inspirasyon sa iban indi lamang sa kaugalingon sini nga mga kabataan kundi pati man sa komunidad.
Samtang, suno naman kay Melinda Aneversario, iloy sang walo ka mga kabataan, iya ginpahayag nga ginpadako sini ang iya mga kabataan nga may disiplina kag may ara sang husto nga paminatasan.
Ginpunto man sini nga apisar indi perpekto ang isa ka pamilya, dapat mangin ehemplo gihapon ang ginikanan sa iya mga kabataan nga unahon permi ang pamilya.
Nagpabutyag man ini sang iya pangabay sa gobyerno nga maghatag sang dugang nga mga programa sa pangabuhian ukon livelihood para sa kababainhan agud mangin malapad pa ang ila mga kinamatarong.
Suno sa iya, importante nga may suporta ang gobyerno agud mapasangkad ang papel sang kababainhan sa pamilya kag komunidad.
