Indi criminally liable ang isa ka indibidwal nga nagpangawat ukon nagkomiter sang krimen sa tion nga mapamatud-an nga mentally ill ukon my deperensya ini sa huna-huna.
Sa interview sang Bombo Radyo kay Atty. Noel Palomado, Bombo Abogado, iya ginpahayag nga kasubong sa kaso sang babaye nga nadakpan nga nangawat sang pila ka mga bibliya sa isa ka mall sa Roxas Village, Iloilo City Proper, natukiban sang mga pulis nga ginapangtipon lang sini ang kinawatan nga items.
Kun mapamatud-an suno sa abogado nga may balatian ini nga kleptomania, indi ini mahimo nga presuhon.
Ang kleptomania, isa ka sahi sang serious mental disorder kun sa diin indi makontrol sang isa ka indibiwal nga magkuha sang mga bagay nga wala niya ginapanag-iyahan para sa thrill.
Nahibaluan nga napaidalom sa preliminary investigation ang kaso nga theft batok sa babaye.
Kun makitaan sang probable cause sang husgado, dagdagan ini sang warrant of arrest.
Nagpanawagan ang Simbahang Katolika sa mga otoridad nga ipa-konsulta anay ang babaye nga nagpangawat sang bibliya sa isa ka mall sa Iloilo City Proper antes nga kasuhan kag presuhon.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center, iya ginpahayag nga sa masami, biktima sang mental disorders ukon may deperensya sa huna-huna ang mga tawo nga nagakomiter sang sala.
