Iga-develop sang Pilipinas ang siyam ka mga isla sa West Philippine Sea (WPS) nga ginakonsiderar nga parte pa sa teritoryo sang pungsod.
Ginpahayag ini ni Armed Forces of the Philippines (AFP) Chief of Staff Romeo Brawner kasunod sang command conference nga ginpangunahan ni President Ferdinand Marcos Jr. sa military headquarters.
Magluwas sa Second Thomas Shoal ukon ang Ayungin, may walo ka iban pa nga features sa WPS ang ginakonsiderar nga nakasulod sa exclusive economic zone (EEZ) sang Pilipinas.
Lakip na diri ang Thitu island ukon ang Pagasa nga amo ang pinakadaku nga isla sa amo nga teritoryo kag nahamtang 300 miles (480 km) west sang probinsya sang Palawan.
Suno kay Brawner, gusto sang militar nga magdala sang desalination machine para sa mga tropa nga nagatinir sa BRP Sierra Madre ukon ang warship nga yara sa Ayungin halin pa sang 1999.
Ginpahayag man ni Brawner nga lakip sa plano sang militar para sa modernisasyon amo ang pagdugang sang barko, radars kag aircraft ilabi na subong nga ginatutukan sang pungsod ang territorial defense.
Nahibaluan nga magluwas sa Pilipinas, ang nagapaindis-indis sa pag-claim sa soberanya sa WPS amo ang Brunei, China, Malaysia, Taiwan kag Vietnam.
Sa sini nga mga pungsod, pinaka-agresibo ang China nga rason nga wala na sini ginasapak mangin ang desisyon sang international tribunal nga una na nagdesisyon nga wala sang basehan ang ila pag-claim sa kadam-an nga bahin sang amo nga kadagatan.#
