Ginpasalig ni Executive Secretary Ralph Recto nga nalakip ang industriya sang tubo sa mga prayoridad sang Marcos administration.
Suno pa sa iya, iga-repaso man ang mga isyu sa kalamay kag ipasaka ini sa nagakaigo nga mga ahensya para sa konsiderasyon sa polisa.
Lakip ini sa mga pasalig nga iya ginbuy-an kadungan sang meeting kay Senator Kiko Pangilinan, ang chairman sang Committee on Agriculture, Food, and Agrarian Reform sa Senado.
Natabo ang meeting matapos ang public consultation sa Talisay City, Negros Occidental sang nagligad nga semana.
Matandaan nga yara si Pangilinan kag ang chairman sang Committee on Agriculture sa Kamara nga nag-atubang man sa sugar planters kag nagpamati sa ila nga mga hibubun-ot, problema, kag mga kahangawa sa multi-billion-peso industry.
Ginpalab-ot naman ni Pangilinan kay Recto ini nga mga problema kaangay sang mataas nga gasto sa produksyon, naganubo nga income sa pagpanguma, supply volatility, kag ang long-term impact sang importation policies sa local producers.
Ang ginpatigayon nga congressional inquiry ang nag-ugat sa mga separado nga resolusyon sa Kamara nga nagahingyo nga malantaw ang pagsarurot sang mill-gate prices sang kalamay kag molasses kag ang epekto sini sa sugar producers, mangunguma, kag ila mga trabahador.
Sa amo nga public consultation, ginpahayag ni Pangilinan nga kaangay sa kun paano nila ginsolusyonan sadto ang problema sa bugas, hatagan man nila sang solusyon ang problema sa kalamay.
Antes sini, may protesta man ang Jalasig Sugar Planters Association sa syudad sang Passi. Ginapanawagan nila ang pag-akto sang gobyerno sa tunga sang tuman ka nubo nga farm-gate prices kasunod sang pagpanglakaak sang pag-import sang kalamay kag kapalpakan sang SRA nga ma-regulate ang merkado.#
