Makaluluoy ang sitwasyon sang mga kabataan sa pila ka bahin sang Ukraine kasunod sang asud-asud nga pagsinigabong sa nagapadayon nga Russian invasion.
Suno kay Bombo International Correspondent Joy Tolentino, direkta sa Kyiv, Ukraine, nagahinibi nalang ang mga kabataan nga nagatinir sa basements kag sa bomb shelters matapos namurag-mugaran sa wala untat kag makakululbaan nga rocket strikes.
Yara na subong sa tunga-tunga sang Kyiv ang nagakatabo nga kinagamo.
Nagadinaguso man ang tanke de giyera sang Russian troops sa capital sang Ukraine kun sa diin mabatian sa bilog nga syudad ang maggahod nga sirena kag paglinupok sang mga armas-luthang.
Una na nagpaandam si Ukrainian President Volodymyr Zelensky nga gub-on gid sang Russia ang bilog nga syudad sang Kyiv ‘overnight.’
Gin-abisuhan man ang mga pumuluyo nga magpabilin sa sulod sang balay ukon shelters kag likawan ang pagtinir malapit sa bintana agud malikawan nga ma-igo sang debris kag mga bala.
Pahayag ni Tolentino, sa nagakahilanabo subong, ang mga bata gid ang pinaka-apektado nga kasubong nga ginapabay-an na lang bangud sa nagalala nga sitwasyon.
Nahibaluan nga wala ginapalampuwas sang Russia pati ang mga kindergarten kag orphanage sa Ukraine.
Ginkumpirma mismo sang Ukraine’s foreign minister nga ginsulod sang Russia ang kindergarten kag orphanage sa Okhtyrka, isa ka gamay nga syudad sa probinsya sang Sumy.
Ginapahayag nga may mga napatay, kag may mga nakaagom sang malala nga mga injuries. Lakip diri ang mga kabataan.
