ILOILO CITY – Ang depression ang isa ka alarming nga sitwasyon sang isa ka tawo.
Ang iban nga mga indibidwal ang naga-utas sang ila kabuhi bangud sini.
Masami naton mabatian nga ang nagaka-depress amo ang mga hamtong na.
Apang, bisan ang mga kabataan ang naga-suprer man sini.
Sa interview sang Bombo Radyo kay Dr. Japhet Fernandez- Deleon, chair sang Department of Psychiatry sa West Visayas State University Medical Center (WVSU-MC), iya ginpahayag nga ang bata nga nagasuprer sang depression ang nakabatyag sang madugay na nga kasubo.
Bangud sini, nabatyagan sang bata nga naga-isahanon siya, nadulaan na sang paglaum kag daw kaangay nga wala na siya sang pulos.
Ang ini nga wala untat nga kasubo ang maka-apekto sa interes sang bata sa adlaw-adlaw niya nga aktibidad, ulubrahon sa eskwelahan kag mangin ang pagpakig-abyan niya kag ang kabuhi sang tagsa ka myembro sang pamilya.
Indi matumod ang ginhalinan sang childhood depression.
Ang pila sa mga factors sini amo ang kombinasyon sang physical health, life events, family history, environment, genetic vulnerability, kag biochemical disturbance.
Yari ang pila ka mga sintomas sang childhood depression:
-nagataas ukon naganubo ang gana sang pagkaon sang bata
-indi makatulog ukon nasobrahan sang tulog
-masami nga nasubuan
-nabudlayan nga mag-concentrate sang mga bagay
-masami nga ginakapoy kag maluya
-nagabatyag nga wala sang pulos ukon masami nga naga-konsensya
-impaired thinking
-sensitive sa rejection
-madali nga maakig
-nadulaan sang interes sa mga hilig
-nagareklamo nga may masakit sa iya apang indi man magpabulong
-wala na nagapasakop sa mga aktibidad sa eskwelahan ukon sa panimalay
-nagapanundom nga mag-utas sang kabuhi, kag
-masami nga nagahibi.
Apang, suno kay Dr. Deleon, indi man tanan nga sintomas ang makita sa bata agud nga mahambal nga naga-suprer ini sang depression.
Kun ang bata ang makitaan sang sintomas sa sulod na sang duha ka semana, kinahanglan na nga magpangayo sang bulig sang doktor.
Ginarekomendar ang pagkonsulta sa doktor nga may specialization sa childhood depression.
