ILOILO CITY — Natumod na ang mga lugar nga pagahiwatan sang ‘community service’ sang mga pamatan-on nga na-involve sa kinagamo sa siyudad sang Iloilo, matapos ang natabo nga rumble sa Gaisano ICC Grounds sang nagligad nga semana.
Sa interview sang Bombo Radyo kay City Councilor Nene Dela Llana, Chairman sang Committee on Social Services, posible nga patinluon ang mga menor-de-edad sa mga plaza pareho sang Plaza Libertad, Esplanade, mga public CR, kag iban pa nga pampubliko nga lugar.
Ginalantaw man nga himuon ini sa ila tagsa ka barangay, pwede sa barangay hall, pagpanghilamon o pag-declogging, depende sa schedule nga igahatag sang barangay officials.
Ginpatawag na ni Mayor Raisa Treñas ang mga ginikanan kag stakeholders agud mahambalan ang masunod nga tikang, samtang ginpahibalo naman ni Dela Llana nga kun indi magbag-o ang kabataan, mahimo sila ibutang sa Balay Dalayunan.
