𝗜𝗟𝗢𝗜𝗟𝗢 𝗖𝗜𝗧𝗬 – Isa ka ginapahayag ‘aswang’ ang ginapatihan nagpakaon kag nagtanyag sang hampanganan sa duha ka mga kabataan sa Brgy. Baldoza, La Paz, Iloilo City antes ang mga ini gin-report nga na-missing.
Ang mga na-missing amo sanday John Ronald Linagad, 4, kag Camelle Zhynn Jareol, 5, lunsay residente sang Zone 3, Barangay Baldoza, La Paz.
Sa interview sang Bombo Radyo kay Maria Lorraine Asturias, iloy ni John Ronald, iya ginpahayag nga ginsaysay mismo sang iya anak nga ginpakaon siya sang mga tinuga nga nagapakuno-kuno nga ginikanan sini kag gindala sa kasagingan.
Ginapahayag nga ginpakaon ang mga ini sang isda kag ginpainom sang tubig ulan.
Magluwas diri, gintanyagan man ang mga kabataan sang duha ka mga hampanganan sa sulod mismo sang salakyan.
Luyag kuntani sang iya mga kabataan nga magpauli na, apang indi man ang mga ini pagpapaulion sang mga indi makila-an nga mga tinuga.
Suno kay Asturias, kagab-i, nakalabay na sila kahapon sa lugar sa diin nakit-an ang duha ka mga kabataan, apang wala man ang mga ini sa sulod sang abandonado nga kotse.
Gani amo na lang ang iya kakibot kun ngaa yara na sa sulod sang kotse ang duha ka mga kabataan subong nga aga.
Samtang, sa interview naman sang Bombo Radyo kay John Ronald, iya ginpahayag nga isa ka ‘aswang’ ang nagkuha sa ila.
Nahibaluan nga antes nakit-an ang mga kabataan, nagpangayo ang ginikanan sang bulig sa alburaryo, sa diin ginpahayag sini nga buhi ang mga kabataan, apang may nagkuha sa ila nga tinuga.
