Nagapanawagan si Punong Barangay John Villanueva sang Boulevard, Molo sa mga ginikinanan nga sekayron kag tatapon sang insakto ang ila nga mga kabataan.
Ini matapos ang nagluntad nga kinakagamo sa tunga sang mga kabataan sa baybayon sang boundary sang Brgy. Boulevard kag Brgy. San Juan, Molo, Iloilo City sang tinalikdan.
Matandaan nga sa isa ka viral video, makita ang mga kabataan ang may bitbit nga pusil, kutsilyo kag iban pa nga delikado nga gamit.
Sa interview sang Bombo Radyo kay Punong Barangay Villanueva, iya ginpahayag nga madugay na nga problema sa ila barangay ang mga ginamo sa tunga sang mga kabataan.
Suno kay PB Villanueva, wala nagkulang ang ila barangay sa pagbantay sa lugar bangud nga magluwas sa mga kapulisan nga naga-roving, naga-deploy sila mismo sang mga barangay tanod.
Apang, gina-bantayan man sang mga kabataan ang mga otoridad kun wala na sa lugar kag mag-umpisa sang gamo.
Pahayag pa sang kapitan, nag-untat na ang mga gamo sang nagligad apang nagbalik na naman sa subong.
Ginpahayag man niya nga halin sa nagkalain-lain nga barangay ang mga kabataan nga involved kag ang iban sa ila ang na-identify na.
Dugang pa ni PB Villanueva, nagakoordinar na ini kay San Juan Punong Barangay Jose Martin Maloto kag iban pa nga mga otoridad agud nga mahatagan sang solusyon ang nasambit nga problema.
Ginapanawagan man sini sa mga kabataan nga likawan ang kaangay nga kinagamo kag mas maayo nga magpukos sa pagtuon.
