ILOILO CITY – Dako nga palaligban ang motibo sa pagluthang patay sa ginpahayag drug ex-convict sa MV Hechanova, Jaro, Iloilo City.
Ang biktima amo si Elezer Galon ukon mas kilala nga alyas “Intsik”, 31, kag residente sang Tanza Esperanza, Iloilo City Proper.
Matandaan nga nakuhaan sa Closed Circuit television (CCTV) camera ang krimen sa diin gintiro sang duha ka beses si Galon sang isa sa
suspek kag ginpanaugan pa kag ginpalukpan liwat.
Sa interview sang Bombo Radyo kay Punong Barangay Wilbur Orada, iya ginpahayag nga mapisan si Galon sa diin nagabaligya ini sang
baboy kag isda kag nagabyahe pa sang tricycle agud makabulig sa iya pamilya.
Suno kay Orada, matinlo man ang rekord sang biktima sa ila barangay.
Pahayag sang natungdan nga nagatinguha man si Galon agud mapauswag ang iya pangabuhi.
Nahibaluan nga naka-angkon sang pito ka igo sang bala ang biktima sa diin duha sa ulo kag lima sa lawas.
Sa subong, padayon ang imbestigasyon sang Jaro Police Station sa motibo sang krimen.
