ILOILO CITY – Nagpaindis-indis ang mga kandidata sang Miss Universe Philippines 2022 sa national costumes competition bilang kabahin sang preliminary event sang amo nga pageant.
Ang tema sang national costumes competition amo ang “Habi” kag gin-require ang tanan nga organizers nga i-incorporate ang hablon sang at least 30% sang ila nga outfit.
Suno sa Miss Universe Philippines Organization (MUP), ang Philippine textile industry ang isa ka importante nga bahin sang aton “uniquely beautiful history.”
Magluwas sa pag-promote sang turismo, tinutuyo man sang MUPH nga ma-promote ang Filipino textiles kag ang hablon bangud ang mga ini ang manggad nga indi dapat nga madula.
Ang pambato sang Iloilo City nga si Dorothy Gemilian ang nagsuksok sang Candelaria-inspired gown samtang ang pambato sang Iloilo Province nga si Vanessa Caro ang nagsuksok sang bayo sang “manugtubok” nga nagarepresentar sang Indigenous Peoples sang Calinog, Iloilo kun sa diin ini naghalin.
Ang 32 ka mga kandidata ang nagapaindis-indis para sa Miss Universe Philippines crown.
Ang grand coronation ang patigayunon sa Abril 30 sa Mall of Asia Arena kun sa diin ang hosts amo sanday Miss Universe 2015 Pia Wurtzbach, Miss Universe 2016 Iris Mittenaere kag Miss Universe 2017 Demi-Leigh Tebow.
Samtang, mangin special guest naman si Miss Universe 2021 Harnaaz Sandhu kag si reigning Miss Universe Philippines Beatrice Gomez ang makorona sa iya successor.
