ILOILO CITY- Nagpanawagan ang Simbahang Katolika sa mga kandidato para sa Mayo 2022 elections nga magplastar sang ila mga panindugan sa isyu sang e-sabong ukon online bulang sa Pilipinas.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga isa ini ka makatulublag nga isyu bangud madamo na sang mga malain nga nagkalahinabo nga naangot sa sugal.
Suno kay Msgr. Oso, indi man kuntani malain ang mag-engage sa sini nga sahi sang aktibidad kun ini ang ginahimo lamang nga kalingawan.
Apang suno sa iya, nangin isa na ini ka addiction bangud naga-involve na ini sang moralidad sang katawhan kun sa diin ginhalimbawa sini ang nahimo sang isa ka iloy nga ginbaligya ang iya lapsag para lang makaangkon sang kwarta nga ibayad sa iya utang sa e-sabong.
