Nagmandu na ang Iloilo Provincial Environment and Natural Resources Office (PENRO) sa ila municipal offices kag sa community environment and natural resources offices nga ipang-identify kun kay sin-o nga mga campaign posters ang ginapangtakod sa mga puno sang kahoy sa probinsya.
Sa interview sang Bombo Radyo kay Salvador Manglinong, Jr., ang officer-in-charge sang Iloilo PENRO, iya ginpahayag nga regular monitoring kag surveillance ang dapat nga himuon kag dapat nga i-coordinate sa ila tagsa ka local government unit (LGU).
Kabahin ini sang pagpabaskog sang kampanya sang Iloilo Provincial Government nga maproteheran ang palibot batok sa iligal nga pagpangtakod sang mga campaign materials.
Ma-charge sa criminal offense ang mapamatud-an nga nagapanglansang sang posters sa kahoy bangud nagahalit ukon naga-cause sa infection sa kahoy ang agi sang lansang.
Lakip ini sa nakasaad sa Presidential Decree (PD) 953. Ang magalapas sa pagsulundan ang pagamultahan sang pagkapreso sa sulod sang anum ka bulan tubtub sa duha ka tuig, kag may multa nga P500 tubtub P5,000 ukon pagka-preso gid kag multa — depende sa discretion sang korte.
Sa idalom sa sini nga decree, ginadumilian ang pag-utod, paghalit, kag pag-injure sa naturally grown kag gintanum nga mga kahoy magluwas lang kun kinahanglanon [nga] para sa public safety.
Ang paglansang, pag-tackle ukon pag-staple sang campaign materials ang makahalit sa protective bark kag punctures sang kahoy nga amo ang nagapahanugot sa pagsulod sang harmful organisms kag naga-cause sang stress sa kahoy nga amo pa ang posible ikamatay sini.
