ILOILO CITY – Gina-abi-abi sang kampo sang broker nga si Mark Taguba ang anuman nga kaso nga ipasaka batok sa iya may kaangtanan sa mga ginbuyagyag nga anomaliya sa Bureau of Customs (BoC).
Ini kasunod sang pahayag ni House Committee on Dangerous Drugs chairman Rep. Robert Ace Barbers nga irekomendar sang iya komite nga kasuhan si Taguba upod sa pila ka mga opisyal sang Customs.
Sa interview sang Bombo Radyo, ginpahayag ni Atty. Leo Superio, legal counsel ni Taguba, nga mas maayo kun makasuhan sa proper venue ang iya kliyente.
Mahatagan sang kahigayunan si Taguba nga pangapinan ang kaugalingon sini.
Una na ginpasakaan sang National Bureau of Investigation sang kaso si Taguba sa Department of Justice bangud sa ginaalegar pagpalasik sang P6.4 billion nga balor sang shabu sa Customs.
Suno kay Superio, wala pa sila sang may nabaton nga subpoena kaangot sa nasambit nga kaso.