Tuman ka bantog ang problema sa utang ukon kun sa legal nga termino amo ang contract of loan, ilabi na subong nga panahon sa tunga sang pandemya.
Sa interview sang Bombo Radyo kay Atty. Rhoan Hiponia, iya ginpahayag nga madamo ang mahimo ipasaka sang isa creditor ukon nagpautang kun ang iya debtor ukon ang nag-utang ang indi gid magbayad.
Sa idalum sang Katarungang Pambarangay Law, mahimo makapasaka sang complaint ukon magpatawag sa barangay ang creditor ilabi na kun lunsay sila residente sang lugar sang iya ginpautang.
Isa man sa remedyo amo ang small claims sa diin mahimo nga makafill-up ang creditor sang form humalin sa korte kag ipatpat ang detalye sang pagkautang kag mapasa batok sa debtor sa sulod lamang sang isa ka-adlaw nga proseso.
Kun ang utang naman nagasobra sa balor nga P300,000, mahimo man pasakaan ang debtor sang complaint for collection of sum of money kag kun may presensya naman sang tseke ang utang, ang kaso nga mahimo ipasaka sa nag-utang amo ang Batas Pambansa Bilang 22 (BP 22) ukon ang Anti-Bouncing Checks Law.
Suno kay Atty. Hiponia, kun indi madala sa isturyahanay ukon verbal communication, mahimo makakuha sang abogado ang creditor agud ihitso ang pagpasaka sang complaint sa debtor.
Ginpaathag man sang natungdan nga apisar wala sang imprisonment ang pagkautang, kun nagpabor sa creditor ang kaso nga iya ginpasaka batok sa debtor, pwede ini makafile sang motion for execution sa diin mahimo makuha ang properties sini.
Apang gin-athag sang abogado nga ang mga nagpa-utang nga verbal agreement lang kag wala sang anuman nga ginpirmahan nga dokumento ang indi pagkilalahon sang korte.
