ILOILO – Wala sang may napilasan sa tropa sang militar matapos ang engkwentro nga nagluntad batok sa mga ginapatihan miyembro sang New People’s Army (NPA) sa banwa sang Lambunao kag Janiuay, Iloilo.
Suno kay Major Cenon Pancito III, spokesperson sang 3rd Infantry Division sang Philippine Army, nagapatigayon ang 12th Infantry Battalion sang Community Support Program nga naga-secure sang construction equipment sa Brgy. Panuran, Lambunao, Iloilo sang una nga nagpalupok ang rebelde nga grupo.
Ginapahayag nga naglawig sang duha ka minutos ang engkwentro antes nag-isol ang rebelde nga grupo nga ginapatihan amo ang Baloy Platoon sang Central Front sang Kilusang Rehiyon Panay.
Pila ka minutos ang nagligad, naka-engkwentro sang separado nga tropa sang 12th Infantry Battalion sa Brgy. Agcarope, Janiuay ang nag-isol nga mga ginapahayag miyembro sang NPA.
Suno kay Pancito, 10 ka minutos ang ginlawig sang engkwento antes nag-isol liwat ang mga miyembro sang NPA.
Ginahibalo pa kun may nasamaran sa mga miyembro sang rebelde nga grupo.
