ILOILO CITY – Kumpirmado nga may insidente sang pagkinawatay nga natabo sa Zone 6, Barangay Boulevard, Molo, Iloilo City kadungan sang sunog nga natabo kagab-i, Disyembre 24, bisperas sang Paskwa.
Sa interview sang Bombo Radyo kay Punong Barangay Virgilio Villanueva, iya ginpahayag nga may mga appliances ang iban nga mga residente nga reported nga nagkaladula.
Bangud sa panic sang mga tawo sang nag-umpisa na lamon ang kalayo pasado 6:00 kagab-i, nagdinali-dali ang mga tawo sa paghalin sa lugar samtang may iban naman nga nagparik-parik sa pagsaylo sang ila nga mga gamit.
Apat ka mga suspek ang ginlagas sang mga barangay tanod apang wala nadakpan.
Sa inisyal nga mga impormasyon nga napalab-ot sa Bombo Radyo, lakip sa mga nakawat amo ang washing machine, speakers, kag de-rasa nga mga manok.
Santo sa alegasyon sang mga residente sa Zone 6, Boulevard, taga-North Baluarte, Molo ang mga kawatan apang ini ang gina-usisa pa sang mga barangay officials.
