ILOILO CITY–Ginpangkakas man sang mga peryante ang ila tagsa ka peryahan kaupod sang Task Force Anti-Squatting and Illegal Structures ukon Task Force ASIS sa palibot sang Jaro Plaza kahapon.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga antes magbutang sang mga istruktura, nagakadapat gid nga ipahibalo sa PSTMO agud ma-usisa nila kun bala pwede nga butangan ang lugar sang mga kiosko ukon peryahan.
Suno kay Conlu, kun mahimo nga magbalik ang mga peryante sa dalan sa Jaro Plaza agud ipahamtang ang ila peryahan, liwat man nila nga i-demolish ini bangud sablag lamang sa dalan ang ginahatag sang mga ini.
Dugang pa ang natungdan, ang mga rides naman nga yara sa kilid sang Jaro belfry ang wala naman ginpangkakas bangud wala man gina-okupar ang dalan nga gina-agyan sang salakyan.
Ang ginplastaran sang mga rides amo ang parking area sa kilid sang belfry.
Sa pihak sini, ginpanindugan naman ni Conlu nga adlaw-adlaw sila sang iya team ng maga-bantay sa mga nabilin nga mga baligyaan kag rides agud ma-usisa sang maayo kun bala nagahatag ini sang huol sa mga motorista kag mismo ginalantaw man nila ang seguridad sang mga tawo.
Samtang, luyag ni Iloilo City Councilor Joshua Alim nga masigurado ang seguridad sang mga motorista kag mga peryante sa Jaro Plaza, Jaro Iloilo City may kaangtanan sa  Jaro Agro Industrial and Charity Fair.
Ini ang rason ni Alim sa pagduso sang ordinansa nga pahalinon ang mga kiosko sa Rizal St. sa nasambit nga plaza.
Sa interview sang Bombo Radyo kay Councilor Alim, iya ginpahayag nga nagakadapat nga pahamtangan sang insakto nga lugar ang mga peryante kag indi sa dalan bangud delikado kun sa dalan sila ang magaplastar.
Suno kay Alim, ang mga peryahan kag kiosko sa dalan sagwa sang Jaro Plaza ang nagahatag man sang huol sa mga motorista.
Nahibaluan nga si Alim  ang nagduso sang ordinansa nga naga-demolish sa mga kiosko, peryahan kag iban pa nga pwesto nga nagasablag sa dalanon.