Iloilo City – Lain-lain ang reaksyon sang mga konsehal sa Iloilo City sa panawagan ni Department of Interior and Local Government Secretary Benhur Abalos sa panawagan sini sa mga generals kag full colonels sa Philippine National Police (PNP) nga magpasa sang ila courtesy resignation.
Ini nga tikang suno sa tiglikom ang pamaagi sang gobyerno agud mapapas ang mga police nga naangot sa illegal drug trade.
Sa interview sang Bombo Radyo kay Iloilo City Councilor Plaridel Nava, iya ginpahayag nga indi solusyon sa pagtapna sa illegal nga droga ang pagpa-resign sa mga pulis.
Suno kay Nava, ang dapat nga himuon sang tiglikom amo nga pasakaan sang kaso ang mga pulis nga naangot sa illegal nga droga.
Ginpahayag sang konsehal nga indi tanan nga mga pulis ang nagahimo sang illegal nga buluhaton.
Indi patas suno kay Nava nga papasahon sang courtesy resignation ang mga generals kag full colonels ilabi na kun wala man ang mga ini sang kaangtanan sa illegal nga droga.
Kun ang performance naman nanday Police Regional Office 6 Director PBGEN Leo Francisco kag Iloilo City Police Office Director Police Col. Leo Batiles ang pagahambalan, ginpahayag ni Nava nga kuntento siya diri.
Suportado naman ni Iloilo City Councilor Atty. Sedfrey Cabaluna ang panawagan ni Abalos.
Sa interview naman sang Bombo Radyo kay Cabaluna, Chairman sang Committee on Peace and Order sa konseho, iya ginpahayag nga santo man sa iya nabaton nga report, amat-amat na nga nagabalik ang illegal nga droga sa syudad.
Suno kay Cabaluna, magluwas sa pagpapasa sa mga general kag full colonels sang courtesy resignation, mas maayo man nga pasangkadon pa ang police visibility.
Gin-athag man sang konsehal nga indi lang katungdanan sang pulis ang pagtapna sa illegal nga droga kundi iya man sang Philippine Drug Enforcement Agency, Local Government Unit officials, volunteers kag mangin sang bug-os nga komunidad.
