Mga konsehal sa syudad sang Iloilo, tunga ang reaksyon sa pag-ilis sang pangalan sang Iloilo Freedom Grandstand

ILOILO CITY–Tunga ang nangin reaksyon sang mga City Councilor sa syudad sang Iloilo tuhoy sa pagbag-o sang pangalan sang maragtason nga Iloilo Freedom Grandstand sa Iloilo City Dinagyang Grandstand.
Ini matapos nga gindeklarar ni Mayor Jose Espinosa III kadungan sang pagsinapol sang Iloilo Dinagyang Foundation Incorporation (IDFI) nga pagabag-uhon na ang pangalan sang Iloilo Freedom Grandstand.
Sa interview sang Bombo Radyo kay Councilor Lyndon Acap, wala man sang problema sa iya kun ilisan ang pangalan sang Iloilo Freedom Grandstand sa Iloilo City Dinagyang Grandstand bangud nga bantog man sa bug-os nga kalibutan ang Dinagyang Festival.
Para sa iya, wala man sang makabig nga “big significance” sa pangalan nga Freedom grandstand kun basehan ang maragtas sang syudad sang Iloilo.
Nagakabalaka naman si Iloilo City Councilor Jay Treñas nga mahimo nga mangin eksklusibo lamang sa Dinagyang events ang Iloilo City Dinagyang Grandstand.
Para sa kay Treñas, maragtason ang Iloilo Freedom Grandstand rason nga iya gid nga ginlauman nga indi pag-ilisan ang pangalan sang grandstand.
Nahibalu-an nga ang pagpatindog sang Iloilo Freedom Grandstand ang may yara sang kaangtanan sa pagpasar sang Republic Act 1209 ukon “Iloilo City Freedom Law” nga ginbalay ni anay senador Rodolfo “Roding” Ganzon.
Nalakip sa gahum sang nasambit nga layi amo ang kinamatarong sang mga Ilonggo nga magpili sang nahamut-an nga alkalde, bise alkalde kag konsehal.