Nagpaandam ang Philippine Egg Board Association sa publiko nga nagabakal sang frozen eggs nga ginapahayag ginabaligya na sa mga merkado.
Suno sa presidente sang asosasyon nga si Irwin Ambal, makatuga sang balatian kaangay sang salmonella ang pagkaon sang frozen eggs.
Suno kay Ambal, ginatipon sang egg farmers ang nagakalabuka nga mga itlog, ginakakas ang shell sini, kag ginabutang sa plastic kag container.
Ginagamit sang bakeshops ang frozen eggs suno kay Ambal apang wala ini ginapanugyan bangud indi ini standard.
Ginapahayag nga mas ginapili sang consumers ang pagbakal sang frozen eggs bangud yara lang sa P55-P60 ang presyo sa kada kilo, mas barato sangsa tray sang itlog nga yara sa P270.
Apang delikado ini suno kay Ambal bangud sa presensya sang bacteria.
Mas maayo suno sa natungdan nga lutuon ini sang maayo agud nga mapatay ang bacteria ukon ang virus.
Dapat ini nga i-refrigerate suno sa iya ukon i-consume sa sulod sang isa ka semana kun nabutang sa normal temperature kag sa mala nga lugar.
Ginpahayag man sini nga may kakulangan subong sa suplay sang itlog apang nagapabilin sa P7 ang farmgate price sang kada isa. ##
