ILOILO CITY – Nakuha ang pila ka mga kontrabando sa sulod sang Bureau of Jail Management and Penology (BJMP) sa Ungka, Jaro, Iloilo City, matapos ang ginpatigayon nga raid sa nasambit nga jail facility.
Ginhalughog sang mga katapo sang Police Regional Office 6 (PRO6), Philippine Drug Enforcement Agency kag sang BJMP ang duha ka mga dormitories kag 22 ka selda sang presuhan kun sa diin nakumpiska ang mga cellphones, sim cards, 41 ka mga lighters, kutsilyo, cutter, USB kag mga pakete sang sigarilyo.
May nakuha man nga cash nga nagalab-ot sa P31,740 apang wala sang iligal nga droga suno sa mga otoridad.
Ginpahayag ni Jail C/Insp. Benny Freddie Cobarde nga sorpresa ang operasyon agud indi matago ang mga kontrabando.
Indi naman mapaathag sang warden nga si Jail Supt. Vicente Papelera kun paano nakasulod ang mga kontrabando bangud ginhugtan na ang pagbantay sa presuhan.
Ang BJMP facility sa Ungka, Jaro ang may yara sang halos 1,300 ka mga preso.