Natukiban sang scientists nagikan sa University of the Philippines (UP) nga halos 100% nga patay na ang mga korales sa Sabina Shoal ukon sa Escoda Shoal sa West Philippine Sea.
Ini nga assessment ang kasunod sang duha ka adlaw nga scientific mission nga gin-conduct kaupod ang Philippine Coast Guard (PCG) sang Martes kag Myerkules agud ma-evaluate ang kondisyon sang corals sa amo nga area.
Suno kay Jonathan Anticamara, professor sa UP Institute of Biology, isa na ini ka “ecological disaster” para sa Escoda ilabi na bangud mayorya ukon halos kabug-usan gid sang manabaw nga parte sang tubig sa shoal ang wala na sang nagakabuhi nga corals kag wala na sang space nga nagapakita sang senyales sang kabuhi.
Ginbuyagyag man sa findings nga may yara sang nagakatabo nga extensive coral bleaching kag nagkalain-lain lamang ang stage sang kamatayon sang corals.
Sa assessment sang scientists, indi na maka-recover pa ang iban nga corals.
Ginsiling man sini nga ang mga isda nga nagkalabilin sa shoal amo ang species nga indi dependent sa coral reefs.
Kun matandaan, sang nagligad nga bulan, gin-report sang PCG nga may ginpangtampok nga ginpangpudpod nga corals malapit sa area. Ginapatihan nga ini nga aktibidad ang kabahin sang preparasyon para sa reclamation sang China agud magtukod sang mga estruktura sa Escoda Shoal nga malapit lamang sa Palawan.
Sang amo nga tion, ginpahayag nga para sa island-building activities, kinahanglan patyon ang corals para magamit nga pundasyon para sa ila tuyo nga island-reclamation.
