Dapat nga maghipos na ang mga kritiko ni President Ferdinand Marcos Jr. matapos arestuhon ang iya mismo pakaisa nga si anay House Speaker kag subong Leyte Representative Martin Romualdez.
Ini ang kaundan sang statement nga ginpaguwa ni Senator Panfilo “Ping” Lacson subong nga gab-i, Septyembre 7, matapos nga ginserbehan na si Romualdez sang arrest warrant sa kaso nga plunder.
Suno kay Lacson, ang pag-aresto kay Romualdez nagapakita nga may tikang kag determinasyon ang administrasyon ni Marcos sa pag-atubang sang kontrobersiya sa mga proyekto kaangot sa flood control.
“With the arrest of his cousin, former Speaker Romualdez, the President’s critics who have accused him of weak leadership and a lack of resolve in confronting the flood-control mess should now be silenced by his actions,” kabahin sang iya nga social media post.
Ginpahayag man sang senador nga matapos ang pag-aresto sa anay Speaker, dapat nga magpadayon ang trial kag tugutan nga ang mga ebidensya amo ang mabatian.
“Let the trial proceed and let the evidence speak. Most importantly, the former Speaker is now given his day in court,” dugang sini.
Sa iya State of the Nation Address (SONA) subong nga 2026, matandaan nga nagpromisa si Marcos nga padayunon ang mga kaso batok sa iya pakaisa may kaangtanan sa kontrobersiya sa flood control projects.
Ginserbe ang arrest warrant sa former House Speaker samtang yara ini sa Cardinal Santos Medical Center sa San Juan City 7:20 subong nga gab-i.
Gin-akusahan siya nga nakabaton sang ginapahayag nga P7.44-billion nga kickback halin sa mga proyekto sang gobyerno, lakip ang flood control infrastructure, halin 2022 tubtob 2025.
Pila ka oras antes ang pag-aresto, gindala si Romualdez sa ospital bangud sa ginatawag nga cardiovascular event kag panic attack, suno kay Interior Secretary Jonvic Remulla.
Una na nga gintawag ni Ombudsman Jesus Crispin Remulla si Romualdez nga isa sa mga “central figure” sa kontrobersiya sa flood control projects.#
