DUBAI – Ginpadayaw sang Overseas Filipino Worker ang maayo nga pagdumala sang Dubai sa COVID-19 pandemic.
Sa interview sang Bombo Radyo kay Tinah Mae Tiñas, tumandok sang Igang, Nueva Valencia, Guimaras kag naga trabaho bilang paralegal sa isa ka law firm sa Dubai, iya ginpahayag nga ginamando sang gobyerno sa mga employer ang mandatory nga paghatag sang facemask, alcohol kag sanitizer.
Magamulta naman ang mga kumpaniya sa tion nga indi mahatag ang mga kinahanglanon sang ila mga empleyado.
Suno kay Tiñas, strikto ang gobyerno sang Dubai sa pagpatuman sang health protocol sa diin ang madakpan nga wala nagasuksuk sang face mask ang multahan sang 3,000 United Arab Emirates Dirham ukon kapin P40,000.
Magluwas sini, libre man ang Reverse transcription polymerase chain reaction (RT-PCR) test kag madasig ang pagpagwa sang resulta sini indi kaangay sa Pilipinas nga nagalab-ot pa sang duha ka semana.
Sa subong ang Dubai ang may 97,760 nga COVID-19 cases, 87,122 ang Recovered kag 426 ang deaths.
