Indi mahimo ibaligya sa mga establisyemento-komersyal ang mga COVID-19 vaccines apisar may yara sang emergency use authorization.
Ini ang gin-athag sang Food and Drug Administration (FDA) samtang ginahulat na sang bilog nga pungsod ang pag-abot sang una nga batch sang bakuna sa masunod nga semana.
Suno kay FDA Director General Eric Domingo, wala pa sang COVID-19 vaccine sa bilog nga kalibutan nga nahatagan sang marketing authorization.
Ang paandam sang FDA ang kasunod man sang nabaton nga report nga may mga private companies nga ginapahayag nga nagbakal na sang vaccines kag abanse nga nagbaligya sini sa mga tawo.
Sa subong suno kay Domingo, under development pa ang mga bakuna rason nga emergency use authorization palang ang ginhatag.
Nagpahayag man si Domingo nga nagapakig-angot ang FDA sa Philippine National Police, Bureau of Customs kag sa National Bureau of Investigation agud mapat-od nga indi makasulod sa pungsod ang mga peke nga bakuna.
