Ginadumilian sang Procurement Service – Department of Budget and Management (PS-DBM) ang siyam ka kumpanya nga may koneksyon kay Pacifico kag Sarah Discaya matapos kanselahon ang ila Philippine Government Electronic Procurement System (PhilGEPS) membership bangud sang pagkabawi sang ila lisensya halin sa Philippine Contractors Accreditation Board (PCAB).
Lakip sa mga kumpanya nga ginadumilian amo ang:
- St. Gerrard Construction Gen. Contractor & Dev’t Corporation
- Alpha & Omega Gen. Contractor & Dev’t Corporation
- St. Timothy Construction Corporation
- Amethyst Horizon Builders And Gen. Contractor & Dev’t Corp.
- St. Matthew General Contractor & Development Corporation
- Great Pacific Builders And General Contractor, Inc.
- YPR General Contractor And Construction Supply, Inc.
- Waymaker OPC
- Elite General Contractor And Development Corp.
Suno sa New Government Procurement Act (NGPA), ang PCAB license isa ka importante nga rekisito para sa PhilGEPS membership. Kun indi mapadayon ang lisensya, ang isa ka kumpanya ginadiskwalipikar sa pagpasakop sa bidding para sa mga kontrata sang gobyerno.
Ginpahayag ni PS-DBM Executive Director Gemaries Caong nga ang PhilGEPS platinum membership amo ang nagapanguna nga rekisito para sa mga proyekto nga nagaagi sa competitive bidding, samtang ang PCAB license kinahanglanon para sa iban nga procurement mode pareho sang small value projects kag emergency cases.
Gindugang pa ni Caong nga ang mga nasambit nga kumpanya indi na makaintra sa civil works projects kun ang procurement mode nagakinahanglan sang PhilGEPS platinum ukon PCAB license.
Ang pamilya Discaya isa sa mga ginapangusisa subong, nga kaangtanan sa ginadudahan nga maanomalya nga mga flood-control projects sang gobyerno.
