ILOILO CITY – Mas mataas ang risgo sang mga lalaki sa pag-angkon sang Scabies kun ipaanggid sa mga babayi.
Ang scabies suno kay Dr. Elvin Tiangha, isa ka medical expert, ang isa ka skin infestation tuga sang mite ukon Sarcoptes scabiei.
Ang nasambit nga microscopic mites ang mahimo nga magtinir sa panit sa sulod sang pila ka bulan kag nagatuga sang pagpalangatol kag rashes.
Suno kay Dr. Tiangha, indi makita ang Sarcoptes scabiei bangud nga tuman ini ka gamay kag mabatyagan na lang ang presensya sini sa tion nga magpula, magpalangatol kag maghabok na ang panit.
Nagatubo ang rashes sa panit suno kay Dr.Tiangha sa tion nga magbuto na ang itlog sang Sarcoptes scabiei kag mahimo man ini nga maglapta ilabi na sa private part sang lawas.
Magluwas diri, makalalaton man ang scabies paagi sa physical contact, pagsubli sang gamit sang tawo nga may yara sang nasambit nga skin infection kag mahimo man ini nga maglaton paagi sa pagpakighilawas.
Gin-athag sang natungdan nga lain man ang human scabies kun ipaanggid sa mga sapat bangud ang Sarcoptes scabiei ang mabuhi lamang paagi sa human host.
May yara sang nanari-sari nga treatment depende kun daw ano ka lala ang scabies apang ang common lang amo nga mabulong ini paagi sa prescribed medicines.
