ILOILO – Mas importante nga istoryahan ang pagpanghanda sang tagsa ka banwa sa tion sang kalamidad ipaanggid sa mga sanction nga dapat ipapanaug sa mga Local Government Units (LGUs) nga wala naga-comply sa mandu sang Office of the Civil Defense (OCD).
Ini ang pahayag ni Department of Interior and Local Government (DILG) Regional Director Engr. Ariel Iglesia.
Suno kay Iglesia, ang gina-engganyo subong amo ang preparasyon kag paghimo sang mga tikang agud mabawi ang kakulangan sa equipment kag komunikasyon.
Suno pa sa opisyal, isa na ka leksyon ang natabo nga bagyo Ursula kag nagapati sya nga ini na ang pinakamaayo nga ‘motivation’ sang mga LGU agud mangin handa sa tanan nga tion.
Nahibaluan nga sa ginpatigayon nga Regional Disaster Risk Reduction and Management Council (RDRRMC) VI Special Full Council Meeting subong nga semana, nagpahayag sang pagkadismaya si OCD Regional Director Jose Roberto Nuñez bangud kalabanan sa problema sang mga banwa amo ang kakulang sa maayo nga komunikasyon rason nga mahinay ang pagsulod sang report sa pamunuan.
Nahibaluan nga nangin problema man ang kakulangan sang mga banwa sang disaster preparedness skills kag disaster facilities.
