ILOILO CITY – Kinahanglan nga makakuha sang passing rate ang tagsa ka Local Government Unit sa Oplan Hawan agud nga indi paghatagan sang preventive suspension ang Local Chief Executive.
Ini ang kasunod sang ginpatigayon nga pagsinapol nga gintambungan sang mga nagabug-os sa Oplan Hawan team kag mga tiglawas sang Department of Interior and Local Government sa pagpamuno ni Regional Director Ariel Iglesia.
Sa interview sang Bombo Radyo kay Iloilo City Department of Interior and Local Government Officer Roy Defiño, iya ginpahayag nga 70% ang passing rate nga igahatag sa tagsa ka Local Government Unit.
Suno kay Defiño, para sa mga mapaslawan nga makakuha sang 70%, nakadepende sa validation kag evaluation team ang pagdesisyon kun bala hatagan sang preventive suspension ang Local Chief Executive.
May kaangtanan diri, ginkalipay naman ni Defiño ang positibo ang reaksyon ni Iglesia sa ginapatigayon nga Oplan Hawan sa syudad sang Iloilo.
