ILOILO – Nagpain na sang pondo ang tagsa ka mga banwa sa probinsya sang Iloilo agud ibakal sang COVID-19 vaccine.
Sa interview sang Bombo Radyo kay San Enrique, Iloilo Mayor Trixie Fernandez kag nagaserbe man nga Presidente sang League of the Municipalities of the Philippines – Iloilo Chapter, iya ginpahayag nga may yara na sang stand by fund ang tagsa ka Local Government Unit (LGU) agud ibakal sang duha ka doses sang bakuna.
Apang suno kay Fernandez, wala pa sang pahanugot sa National Government nga direkta nga magabakal ang tagsa ka mga LGU sang bakuna.
Suno sa alkalde, nakareserve lang ang nasambit nga pondo apang sa tion nga baydan sang National ukon Provincial Government ang bakuna, ila nga i-reprogram ang budget sa iban pa gid nga programa sang LGU.
Nahibaluan nga nagpirma na si Iloilo Governor Arthur Defensor Jr. sang agreement sa AstraZeneca agud nga magbakal sang 270,000 doses nga COVID-19 vaccine.
