ILOILO CITY – Ginmanduan na sang Department of Public Works and Highways City District Engineering Office (DPWH-CDEO) ang contractor sang bag-o nga building sa Iloilo City National High School o City High nga magsumite sang report.
Ini matapos nga gindangop sang Bombo Radyo Iloilo sa igtalupangod ni Engr. Rodney Gustilo sang DPWH-CDEO, ang natalupangdan sang isa ka Civil Service Examinee, nga mga litik sa third floor kag sa alley sang tatlo ka panalgan nga 18-classroom building nga ginpondohan sang Philippine Amusement and Gaming Corporation (PAGCOR).
Suno kay Gustilo, sa inisyal nga paathag sa iya sang contractor, temperature cracks lamang ang nakit-an nga mga litik kag indi makabig nga structural damage.
Gilayon man sini nga ginpa-rectify ang amo mga litik kag ginapasumite sang progress report ang contractor.
Nahibaluan nga ang building ang wala pa ma-turnover sa DPWH kag natalana pa nga bayaran sang ahensya kun mahuman na ang proyekto.
Ginpahayag ni Engr. Gustilo nga P38 milyon ang pondo sang PAGCOR para sa amo nga proyekto.