MANILA – Mansig diskarte na lang ang mga Locally Stranded Individuals nga yara sa Ninoy Aquino International Airport agud nga mangin safe kag agud makakita sang paagi nga makapauli na sa labing madali nga tion.
Sa exclusive interview sang Bombo Radyo kay Argene Azucena sang Concepcion, Iloilo, iya ginpahayag nga pila na siya ka bulan nga nagahulat agud nga makapauli matapos nga makapila beses nga ginkansela sang Cebu Pacific ang flight kag suno sa panugyan sang nasambit nga airline company, hulaton sang mga pasahero ang change of schedule sa Setyembre 1.
Ginpahayag ni Azucena nga may yara man sang pagkaon kag tent nga ginhatag sa ila apang mas makapaayo nga madayon na ang ila pagpauli ilabi na nga may isa sila ka upod nga nagpositibo sa COVID-19.
Si Azucena ang nagpadulong sa Metro Manila agud magtrabaho kag matapos ang pila ka bulan, nagdesisyon siya nga magpauli apang naabutan sang lockdown.
Nagakabalaka naman si Mary Jane Bunagan sang Barotac Nuevo, Iloilo, sa seguridad sang iya duha ka tuig nga apo kag 12 anyos nga anak.
Sa exclusive interview sang Bombo Radyo kay Bunagan, iya ginpahayag nga anum na ka beses nga ginkansela sang Cebu Pacific ang ila flight.
Suno kay Bunagan, gintinguhaan niya nga makakuha sang tanan nga requirements apang ang mabudlay lang amo nga mahal kag may expiration ang COVID-19 test paagi sa swab sample kag masami nga nagabag-o bag-o ang mga patakaran.
Ginkwestyon man ni Bunagan kun nga-a ang iban nga Locally Stranded Individuals kag repatriated Overseas Filipino Workers nga nakakuha sang flight sa iban nga airline company ang nakapauli apang sa ila bahin, makapila na ka beses nga nakansela ang ila flight.
Isa man sa ginakabalak-an ni Bunagan amo nga may mandu na si Presidente Rodrigo Duterte nga ipaidalom sa Modified Enhanced Community Quarantine ang Metro Manila kag ginmandu naman ang cancellation of flights.
Si Bunagan ang nagpadulong sa Laguna agud idul-ong ang iya apo apang naabutan sila sang lockdown.
